Ajaýyp döwrüň merdana nesli
Welaýat Baş bilim müdirliginiň, Türkmenistanyň Magtymguly adyndaky Ýaşlar guramasynyň Balkanabat şäher geňeşiniň bilelikde guramaklarynda baky Bitaraplygymyzyň 28 ýyllyk toýy mynasybetli Balkanabat şäherindäki daşary ýurt dillerine ýöriteleşdirilen 3-nji orta mekdepde geçirilen «Merdana nesil - 2023» atly şadyýan bäsleşik ýokary ruhubelentlige beslendi. Oňa şäherdäki orta mekdepleriň 3-5-nji synplarynda okaýan oglanlar gatnaşdylar.
Bäsleşigiň şertlerine laýyklykda, okuwçy oglanlar Watana bolan söýgüsini, ata-babalarymyzyň gahrymançylykly synmaz ruhuna belent sarpasyny, bagtyýar zamanamyzyň ýeten belent sepgitlerini çeper sözde beýan etdiler. Olar şorta sözleri ýerine ýetirmekde hem biri-birinden kem durmadylar. Ýurdumyzda amala aşyrylýan uly ösüşleri, bagtyýar çagalygy, dost-doganlygy wasp edýän şirin aýdym-sazly çykyşlary ýerine ýetirdiler.
Netijede, Balkanabat şäherindäki 23-nji orta mekdebiň 3-nji synp okuwçysy Arzuw Tagannurow birinji, daşary ýurt dillerine ýöriteleşdirilen 3-nji orta mekdebiň 5-nji synp okuwçysy Şamyrat Myratjanow ikinji orunlara mynasyp bolup, bäsleşigiň welaýat tapgyryna gatnaşmaga hukuk gazandylar. Ýeňijilere bäsleşigi guraýjylar tarapyndan Hormat hatlary hem-de sowgatlar gowşuryldy.
