Ak we gara leglekler

Bu guşlara welaýatymyzda Etrek we Sumbar derýalarynyň aşaky akymlarynda duş gelmek bolýar. Olar uçup geçýän, höwürtgeleýän guşlardyr. Şolardan 2 görnüşi ýurdumyzda gabat gelýär. Ýazyna mart-aprel, güýzüne sentýabr-oktýabr aýlarynda uçup geçýärler.

Ak leglekleriň ýelek örtüginiň aglaba bölegi ak bolansoň, şeýle atlandyrylýar. Ganatlarynyň uçlary ýalpyldawuk gara, uzyn çüňki we aýaklary gyzyldyr. Mäkiýany horazyndan biraz kiçiräk bolup, reňkleri boýunça tapawutlanmaýarlar. Leglekleriň ganaty 55-60 santimetr, agramy 4 kilograma golaý bolýar.

Gara leglekler ölçegi we daşky görnüşi ak leglege çalymdaş bolup, kellesi, boýny, petekesi, bedeniniň üstki tarapy we guýrugy goýy ýaşyl we gyzylymtyl gök, ýalpyldawuk garadyr. Gözüniň töweregindäki ýalaňaç halka, çüňki we aýaklary gyzyl bolýar. Gara leglekler seýrek görnüş bolup, Türkmenistanyň Gyzyl kitabyna girizilendir.

Bu guşlaryň göçüş döwri adatça 3-10 hepde aralygynda bolup, olar bir günüň dowamynda 7-10 sagat uçmaga, sagatda 50 kilometr geçmäge ukyplydyrlar. Gurbagalar, itbalyklar, balyklar, mör-möjekler, balykgulaklar, maýda gemrijiler — syçanlar, alakalar, şeýle-de beýleki guşlaryň ýumurtgalary bilen iýmitlenýärler.