Armaweriň, pagtaçylar!

Balkan welaýatynyň pagta meýdanlarynda häzirki günlerde zähmet gaýnap-joşýar. Meýdan düşelgelerinde aýdym-sazly dabaralar geçirilip, olar zähmet adamlaryny yhlasly işlemäge ruhlandyrýar. Şeýle çäreleriň biri ýakynda Balkan welaýat häkimliginiň, welaýatyň jemgyýetçilik guramalarynyň bilelikde guramaklarynda Gyzylarbat etrabynyň “ak altynly” meýdanlarynda geçirildi. Sungat ussatlarynyň joşgunly çykyşlarynda Berkarar döwletiň täze eýýamynyň Galkynyşy döwrüniň, eşretli durmuşymyzyň, edermen babadaýhanlarymyzyň gazanýan zähmet üstünlikleriniň waspy ýetirildi. Günortan arakesme mahalynda ýaňlanan döwrebap aýdym-sazlar, ýerine ýetirilen joşgunly tanslar, şowhunly halk döredijilik çykyşlarydyr gülküli sahnalar pagtaçylara ruhy lezzet paýlap, olary täze zähmet ýeňişlerine ruhlandyrdy.

Aýdym-sazly dabaranyň dowamynda pagta ýygymynda tapawutlanyp işleýän kärendeçilere, kombaýnçylara, awtoulag sürüjilerine Türkmenistanyň Demokratik, Agrar partiýalarynyň Balkan welaýat komitetleriniň, Türkmenistanyň Kärdeşler arkalaşyklarynyň Balkan welaýat birleşmesiniň, Türkmenistanyň Magtymguly adyndaky Ýaşlar guramasynyň Balkan welaýat geňeşiniň sowgatlary dabaraly ýagdaýda gowşuryldy.

Bu ýerde amaly-haşam sungatynyň, oba hojalyk önümleriniň sergileri guralyp, olarda ekerançylyga degişli milli däp-dessurlar, azyk önümleriniň taýýarlanylyşy öz beýanyny tapdy.