Awaza — dostluk mekany
Şu günler “Awaza” milli syýahatçylyk zolagynda “Awaza - dostluk mekany” atly medeni-köpçülikleýin we sport çäreleri ýokary ruhubelentlikde dowam edýär. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ýardam bermeginde geçirilýän bu çärelere Arkadag şäherinde mekdep okuwçylarynyň arasynda geçirilen halkara matematika olimpiadasynda birinji orny eýelän Russiýa Federasiýasynyň mekdep okuwçylary, ýokarda ady agzalan gaznanyň hemaýat-goldawlary bilen bejergi alan çagalar, paýtagtymyzdaky Döwletliler köşgünde terbiýelenýän we bilim alýan çagalar gatnaşýarlar.
Awaza derýasynda gämili gezelenç, “Gämiler dünýäsi” muzeýiniň täsinlikleri bilen tanyşmak, gämili Hazar deňzine guralan gezelenç, “Älemgoşar”, “Jadyly kenar”, “Deňiz merjeni” seýilgähleriniň, “Awaza” akwaparkynyň, interaktiw suw çüwdürimler toplumynyň gözellikleri, aýdym-sazly çäreler çagalarda unudylmajak täsirleri galdyrdy. Sportuň ýeňil atletika, küşt, şaşka, düzzüm, kenarýaka woleýboly, stol tennisi, tanap çekmek görnüşleri, türkmen milli oýunlary boýunça geçirilen ýaryşlar olaryň sporta söýgüleriniň, höwesleriniň egsilmezdigini görkezdi.
Timur Tazeýew,
Russiýa Federasiýasynyň Tatarystan Respublikasynyň Kazan şäherindäki 131-nji liseýiň okuwçysy:
- Mekdep okuwçylarynyň halkara matematika olimpiadasynda birinji orna mynasyp bolan çagalaryň biri bolup, “Awaza” milli syýahatçylyk zolagynda ýerleşýän “Daýanç” sagaldyş merkezinde on günläp dynç alýandygymyz üçin özümizi örän bagtly saýýarys. Bu ýerde türkmenistlanly deň-duşlarymyz bilen dostlaşmagymyz aýratyn begendirýär.
Biz “Awaza” milli syýahatçylyk zolagy hakynda ozalam eşidipdik. Ýöne ol taryp edişlerindenem owadan eken. Hazar deňziniň ajaýyp kenaryna, oýun-attraksionly seýilgählere, aýratynam, deňze gämili guralýan gezelençler bizde iň ýakymly täsirleri galdyrdy.
Kamilla Mugatarowa,
Russiýa Federasiýasynyň Tatarystan Respublikasynyň Naberežnyýe Çelny şäherindäki 26-njy gimnaziýanyň okuwçysy:
- Dünýäniň iň owadan ýurtlarynyň biri Türkmenistan diýip, arkaýyn aýdyp bilerin. Men muňa Arkadag şäherinde geçirilen halkara matematika olimpiadasyna gatnaşmak üçin gelenimde hem göz ýetirdim. Ine-de, bu güneşli ýurda ýene bir ýola geldim. Hazaryň gözel kenarynda dynç alýarys we tomusky dynç alyş günlerimizi örän şatlykly geçirýäris.
Biz muzeýlerde bolup, türkmen halkynyň baý taryhy, milli gymmatlyklary we däp-dessurlary bilen hem ýakyndan tanyşdyk. Şatlyk-şowhunly geçirilýän medeni-köpçülikleýin we sport çäreleri bolsa Türkmenistanyň dost-doganlygyň mekanydygyny ähli aýdyňlygy bilen görkezýär.
Gurbanmyrat Japarow,
Ahal welaýatynyň Änew şäherindäki 27-nji orta mekdebiň okuwçysy:
Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň hemaýaty bilen bejergi alyp, saglygymy dikelden çagalaryň biri hökmünde şol gaznanyň ýardam bermeginde ajaýyp Awazada dynç alýandygyma begenjimiň, buýsanjymyň çägi ýok. Biziň - çagalaryň sagdyn durmuşda ýaşamaklary, okamaklary, dynç almaklary üçin ähli şert-mümkinçilikleri döredip berýän Gahryman Arkadagymyza we Arkadagly Gahryman Serdarymyza tüýs ýüregimden alkyş aýdýaryn.
“Awaza - dostluk mekany” atly medeni-köpçülikleýin we sport çärelerine gatnaşyp, russiýaly okuwçylar bilen dostlaşmagymyň meni diýseň begendirýändigini aýratyn nygtasym gelýär.
Çynar Angaýewa,
Aşgabat şäherinde ýerleşýän Döwletliler köşgüniň okuwçysy:
Ajaýyp zamananyň bagtyýar ýaş nesliniň wekili hökmünde eziz Watanymyzyň çagalaryň ähli arzuwlarynyň hasyl bolýan ýurdudygyna “Awaza - dostluk mekany” atly medeni-köpçülikleýin we sport çärelerine gatnaşýan çagalaryň her biri aýdyň göz ýetirýändir diýip, buýsanç bilen aýdyp bilerin.
Awazada geçirýän häzirki günlerimiz durmuşymyzyň iň ajaýyp pursatlary bolup ýadymyzda hemişelik galar. Bu ýerde döredilen iň gowy şert-mümkinçilikler, aýdym-sazly çäreler, sport bäsleşikleri, gözel ýerlere gezelençler bizde uly täsirleri galdyrýar. Biziň özümizi bagtly çagalar diýip aýtmaga doly hakymyz bardyr.
