Balkanabat şäherindäki ýöriteleşdirilen 2-nji orta mekdebiň mugallymy: Gülnabat Annataganowa

Geçen ýekşenbe güni ýurdumyzda bolup geçen uly syýasy-jemgyýetçilik çäre — Türkmenistanyň Mejlisiniň deputatlarynyň, welaýat, etrap, şäher halk maslahatlarynyň we Geňeşleriň agzalarynyň saýlawlary il agzybirliginde, ýurt parahatçylygynda her bir günümiziň şanly wakalara beslenýändigini görkezdi.

Berkarar döwletiň täze eýýamynyň Galkynyşy döwründe türkmeniň gadymy häkimiýetlilik däplerine daýanýan özgertmelere badalga berilmegi netijesinde milli demokratik ýörelgelerimiziň rowaçlanýandygyna bu saýlawlaryň mysalynda aýdyň göz ýetirmek boldy. Elbetde, ýurdumyzda saýlawlary demokratik esasda geçirmekde baý tejribe toplanylandygy guwandyryjydyr. Raýatlaryň saýlawlarda öz erk-islegini erkin beýan etmegini kepillendirýän saýlaw kanunçylygy milli we halkara hukugyň umumy ykrar edilen kadalaryna laýyklykda kämilleşdirildi. Raýatlaryň işjeňligi, aýanlyk we açyklyk ýagdaýynda geçen saýlawlara biz — bilim işgärleri hem ýokary guramaçylykda gatnaşyp, öz raýatlyk borçlarymyzy berjaý etdik.

Welaýatymyzda döredilen saýlaw uçastoklarynyň 272-sinde hem saýlawlar gününde baýramçylyk ruhunyň höküm sürendigini aýratyn bellemek gerek. Ol ýerlerde saýlawçylar duz-çörek bilen garşylanylyp, aýdym-sazlaryň sesi belentden ýaňlandy. Bu bolsa bagtyýarlykdan, agzybirlikden nyşandyr.

Umuman, Türkmenistanyň Mejlisiniň deputatlarynyň, welaýat, etrap, şäher halk maslahatlarynyň we Geňeşleriň agzalarynyň saýlawlary açyklyk, aýanlyk we raýatlaryň öz pikirlerini erkin beýan edip bilmek ýörelgeleri esasynda geçirilip, ol ýurdumyzda hemişe halkyň erk-islegine daýanylýandygyny bütin aýdyňlygy bilen görkezdi.