Baý mazmunly medeni çäreler

«Awaza» milli syýahatçylyk zolagynda geçirilen Türkmenistanyň, Azerbaýjan Respublikasynyň we Türkiýe Respublikasynyň döwlet Baştutanlarynyň birinji üçtaraplaýyn sammitiniň çäklerinde guralan dürli çäreler baý many-mazmuna eýe boldy. «Berkarar» myhmanhanasynda gurnalan halkymyzyň amaly-haşam sungatynyň we el işleriniň sergisi hem şolaryň hatarynda mynasyp orun alyp, bu ýere gelenlerde unudylmajak täsirleri galdyrdy. Şeýle-de, bu ýerde milli däp-dessurlarymyz giňden şöhlelendirilip, baý medeni mirasymyzyň Berkarar döwletimiziň täze eýýamynyň Galkynyşy döwründe täzeçe öwüşginde rowaçlyklara beslenýändigini görkezdi.

«Berkarar» myhmanhanasynda türkmen milli lybaslarynyň görkezilişi-de hemmelerde ýakymly täsirleri galdyrdy. Onda gadymy keşdelerimiziň täze döwrebap öwüşgin berlen nusgalary bilen bezelen milli egin-eşikleriň köp dürli görnüşleri tomaşaçylara görkezilip, olar geçmiş bilen şu günüň özboluşly sazlaşygyny emele getirdi.