Beýik akyldaryň nurana keşbi

Türkmen halysy dünýä gymmatlyklarynyň hatarynda tanalmak bilen, özüniň gözelligi bilen dünýäni haýran goýýar. Gözbaşyny gadymyýetden alyp gaýdýan halyçylyk sungatynda ençeme nepis halylar dokaldy. Gelin-gyzlaryň mähir-yhlasyndan dörän ajaýyp halylaryň biri-de Balkan welaýatynyň Magtymguly etrabynyň Magtymguly Pyragy muzeýinde saklanýar. Türkmen halkynyň beýik akyldary Magtymguly Pyragynyň keşbi çitilen «Magtymguly Gerkezde» atly halyny söz ussadynyň ýubileýi mynasybetli 1983-nji ýylda Aşgabadyň çeper halyçylyk kärhanasynyň çeper elli halyçylary dokapdyrlar. Üstünden kyrk ýyla golaý wagt geçse-de, ol ýaňy dokalan ýaly öz öwüşginini saklap gelýär.

«Magtymguly Gerkezde» atly haly barada aýdylanda, ony ussat halyçylaryň 12-si iki toparda 60 günüň dowamynda dokamagy başarypdyrlar. Nepis halynyň meýdany 9 inedördül metrdir. Onda akyldaryň nurana keşbi bilen Sumbar jülgesiniň tebigatynyň gözellikleri utgaşýar. Muzeýiň görnükli ýerinde ýerleşdirilen halynyň dokalyşy barada bu ýere gelýänlere gürrüň berilýär.