Beýik şahyra belent buýsanjyň nyşany

Balkan welaýat häkimliginiň mejlisler jaýynda ýakynda türkmen, rus we iňlis dillerinde aýratyn kitaplar görnüşinde neşir edilen “Magtymguly” atly ýygyndynyň tanyşdyrylyş dabarasy geçirildi.  Balkan welaýat we Balkanabat şäher häkimlikleriniň, jemgyýetçilik guramalarynyň wekilleriniň, edara-kärhanalaryň işgärleriniň, il sylagly ýaşulularyň, mährem eneleriň, bagtyýar ýaşlaryň gatnaşmagynda geçirilen dabara ýokary ruhubelentlige beslendi.

Tanyşdyrylyş dabarasynda çykyş edenleriň nygtaýyşlary ýaly, täze kitabyň akyldar şahyryň doglan gününiň 300 ýyllyk toýunyň ýokary ruhubelentlikde bellenilýän “Pähim-paýhas ummany Magtymguly Pyragy” ýylynda çapdan çykmagy aýratyn many-mazmuna eýedir. Ajaýyp zamanamyzda beýik akyldaryň şan-şöhraty, abraý-mertebesini belende göterilýär, dünýä ýaýylýar. Gözel paýtagtymyzyň günorta künjeginde şahyryň belent heýkeliniň we medeni-seýilgäh toplumynyň dabaraly açylmagy, beýik akyldaryň ýubileý toýy mynasybetli ýurdumyzda we halkara derejede dabaraly çäreleriň geçirilmegi, “Magtymguly” atly ýygyndynyň çap edilmegi muny subut edýär.

Ýokary ruhubelentlikde geçirilen tanyşdyrylyş dabarasynda medeniýet we sungat ussatlarynyň çykyşlaryna giň orun berildi. Olarda täze taryhy döwrüň beýik ösüşlerini, parahatçylygy, dost-doganlygy wasp edýän aýdymlar, şeýle-de Magtymguly Pyragynyň sözlerine döredilen aýdymlar belentden ýaňlandy.