Birinji liganyň ýeňijileri sylaglandy

Futbol boýunça ýurdumyzyň milli çempionatynyň birinji ligasynyň Balkan sebiti boýunça oýunlar tamamlanyp, ýakynda ýaryşda öňdäki orunlary eýelän toparlary sylaglamak dabarasy boldy. Türkmenistanyň Futbol federasiýasynyň hem-de Balkan welaýatynyň futbol federasiýasynyň bilelikde guramagynda Balkan welaýat häkimliginiň mejlisler jaýynda geçirilen çärä dürli pudaklaryň we jemgyýetçilik guramalarynyň wekilleri gatnaşdylar.

Uly ruhubelentlige beslenen dabaraly çärede çykyş edenler ýurdumyzda sportuň ähli görnüşiniň, şol sanda futbolyň ösmegi üçin hemme şert-mümkinçilikleriň döredilýändigi, köpçülikleýin bedenterbiýäniň, sagdyn durmuş ýörelgesiniň jemgyýetimizde has-da rowaçlanmagy üçin taýsyz tagallalaryň edilýändigi barada gürrüň etdiler.

Soňra ýaryşyň ýeňijilerine - Balkan welaýat bedenterbiýe we sport baradaky Baş müdirliginiň Balkanabat şäherindäki 2-nji sport mekdebiniň “Galkynyş” toparyna birinji orny eýeländigi üçin Kubok we altyn medallar, “Türkmennebit” döwlet konserniniň “Türkmennebit” toparyna ikinji orny eýeländigi üçin kümüş, Balkanabat şäheriniň Gumdag şäherçesiniň “Gumdag” toparyna üçünji orny eýeländigi üçin bürünç medallar, Türkmenistanyň Kärdeşler arkalaşyklarynyň Balkan welaýat birleşmesiniň, TMÝG-niň Balkan welaýat geňeşiniň gymmatbaha sowgatlary dabaraly ýagdaýda gowşuryldy.