Bolgar burçunyň bitginli hasyly

Türkmenbaşy şäheriniň golaýyndaky ýyladyşhanada dürli gök önümleri ýetişdirmekde möhüm işler alnyp barylýar. Türkiýede, Ispaniýada, Germaniýada öndürilen enjamlar bilen üpjün edilen ýyladyşhanada alnyp barylýan işler döwrebap tehnologiýalara daýanýar. Bu ýerde ýetişdirilýän gök önümler ýokary hilliligi, ekologiýa taýdan arassalygy bilen tapawutlanýar. 4 gektara barabar bolan ýyladyşhanada bolgar burçuny ösdürip ýetişdirmek guramaçylykly ýola goýuldy. Kemsiz idegi ýetirilýän bolgar burçlary mineral dökünler goşulyp baýlaşdyrylan suw bilen suwarylýar. Häzirki wagtda bu ekiniň hasylyny ýygnamak işleri guramaçylykly dowam etdirilýär. Möwsümiň başyndan bäri ýygnalan bolgar burçunyň möçberi 30 tonnadan gowrakdyr. Bütin möwsümiň dowamynda ýene-de azyndan bolgar burçunyň 150 tonna golaýyny ýygnamak göz öňünde tutulýar. Ýygnalan hasyl içerki we daşarky bazarlara ugradylýar.