Deňze guralan gezelenç

«Awaza» milli syýahatçylyk zolagynda Medeniýet hepdeligine gatnaşýan döredijilik işgärleriniň Hazar deňzinde gämili gezelenji guraldy. Ilki bilen, döredijilik işgärleri Türkmenbaşy Halkara deňiz portuna gezelenç etdiler. Ýurdumyzyň medeniýet we sungat ussatlarynyň ýerine ýetiren aýdym-sazlary, döredijilik toparlarynyň tanslary bu ýere ýygnanlara ruhy lezzet paýlady. Döredijilik işgärleriniň gatnaşmaklarynda guralan täsirli söhbetlere, aýdym-sazlara beslenen gämili gezelenje gatnaşanlar «Awaza» milli syýahatçylyk zolagynyň gözel görnüşini, tebigatyň aýratynlyklaryny, gojaman deňziň giňişliklerini höwes bilen synladylar, ajaýyp görnüşlerden lezzet aldylar. Akyldar şahyrymyz Magtymguly Pyragynyň şygyrlarynyň okalmagy gezelenjiň many-mazmunyny hasam artdyrdy. Joşgunly gazallarda, küştdepdilerde ýurdumyzyň ösüşleri, alnyp barylýan beýik işleriň waspy belentden-belent ýaňlandy.