Eýjejik gyzjagazlaryň bäsleşigi

 Türkmenistanyň Magtymguly adyndaky Ýaşlar guramasynyň Merkezi geňeşiniň we Türkmenistanyň Bilim ministrliginiň Milli bahar baýramy mynasybetli bilelikde yglan eden «Iň eýjejik gyzjagaz — 2025» atly bäsleşiginiň Balkanabat şäher tapgyry 25-nji orta mekdepde geçirildi. Üç şertden ybarat bolan bäsleşikde gyzjagazlar aýdym-sazlarda ata Watanymyzyň, bagtyýar çagalygyň, dost-doganlygyň, parahatçylygyň waspyny ýetirdiler. Milli egin-eşik geýnip, olary goşgy setirlerinde şahyrana beýan etdiler. Şeýle-de ýaş aýratynlyklaryna görä el işlerini ýerine ýetirip, sadaja nagyşlarda keşde çekdiler, alaja ördüler.

Netijede, Balkanabat şäherindäki 2-nji orta mekdebiň 2-nji synp okuwçysy Narbibi Annagylyjowa birinji, 16-njy orta mekdebiň 3-nji synp okuwçysy Mähriban Soltangulyýewa ikinji orunlary eýeläp, bu bäsleşigiň welaýat tapgyryna gatnaşmaga hukuk gazandylar.