Gelin saçlygy

Gadymy zergärlerimiz gelin-gyzlarymyzy kümüşden, altyndan ýasalan şaý-sepler bilen bezäpdirler. Şaýlar ýasalanda ýaş aýratynlygy hem göz öňünde tutulypdyr. Türkme şaý-sepleriniň arasynda saçlyk hem aýratyn orun tutupdyr. Saçlyk saçyň üsti bilen goýberilýän bezeg şaýydyr. Balkan welaýat taryhy we ülkäni öwreniş muzeýinde saklanýan gelin saçlygy XIX asyr bilen senelenýär. Ol kümüşden galyplama, ýençme we kebşirleme usulynda iki gatdan ýasalypdyr. Bu bezeg şaýynyň ýüzüne altyn suwy çaýylyp, birnäçe hakyk gaşlary oturdylypdyr. Birnäçe kiçiräk gupba meňzeýän böleklere zynjyrlar arkaly birleşýän ençeme düwmeler dakylypdyr. Bu saçlyk ýaş gelinleriň saçyna dakmaga niýetlenen bezeg şaýydyr.