Guşçulyk toplumynyň işleri ileri

Hormatly Prezidentimiz: «Telekeçileri hemmetaraplaýyn goldamak döwletimiziň durmuş-ykdysady ösüşiniň möhüm ugry bolup durýar. Bu goldaw türkmen telekeçilerine ýurdumyzda bazar gatnaşyklaryny ösdürmäge, içerki we daşarky bazarlary bäsleşige ukyply harytlar bilen üpjün etmäge, öňdebaryjy tilsimatlary önümçilige ornaşdyrmaga, täze önümleri çykarmaga giňmümkinçilik berýär» diýip nygtaýar.

Ýurdumyzda içerki bazary özümizde öndürilýän önümler bilen bolelin üpjün etmekde, ýurdumyzyň eksport kuwwatyny artdyrmakda, şeýlelikde, köpugurly ösüş arkaly milli ykdysadyýetimiziň binýadyny pugtalandyrmakda telekeçiler uly işleri bitirýärler. Şolaryň hatarynda Türkmenistanyň Senagatçylar we telekeçiler birleşmesiniň agzasy bolan «Nurly meýdan» daýhan hojalygyna degişli guşçulyk toplumyny görkezmek bolar. Daýhan hojalygynyň ýyllyk kuwwatlylygy 8 million ýumurtga öndürmäge niýetlenen döwrebap guşçulyk toplumynda towuklary talabalaýyk idetmek we köpeltmek üçin ähli şertler bar. Bu ýerde idedilýän towuklar, esasan, loman tohumly bolup, olar ýumurtga berijiligi bilen tapawutlanýar. Guşçulyk toplumynda her aýda 1350 müň ýumurtga alynýar.

«Nurly meýdan» daýhan hojalygy ýurdumyzda ilkinji bolup, inkubasiýa boýunça taslamany durmuşa geçirdi. Bu usul broýler guş etini hem-de ýumurtgalary senagat möçberinde öndürmäge mümkinçilik berýär, şunda häzirki zaman guşçulyk pudagynda synagdan geçirilen tehnologiýa peýdalanylýar.