Kalplary buýsanja beslän halkara baýram

Bütindünýä welosiped güni Balkan welaýatynda hem ýokary ruhubelentlikde bellenip geçildi. Halkara sene mynasybetli Balkanabat şäherindäki «Türkmeniň ak öýi» binasynyň öňündäki meýdançada geçirilen aýdym-sazly dabara il agzybirliginde, ýurt parahatçylygynda toýlarymyzyň toýlara ulaşýandygynyň aýdyň subutnamasyna öwrüldi. Sungat ussatlarynyň ýerine ýetiren aýdym-sazlarynda, tanslarynda mähriban Watanymyzyň, ösüşlere beslenýän döwrümiziň, sagdyn durmuşyň, sportuň waspy öz beýanyny tapdy. Baýramçylyk keşbine beslenen meýdançada ýaş türgenleriň ýerine ýetiren görkezme çykyşlary, welaýatymyzyň ezber türgenleriniň gazanan üstünliklerini şöhlelendirýän sergi hem ýaýbaňlandyrylyp, dabaranyň many-mazmunyny artdyrdy. Baýramçylygyň esasy çäreleriniň biri «Türkmeniň ak öýi» binasynyň ýanyndan badalga berlen köpçülikleýin welosipedli ýöriş boldy. Edara-kärhanalaryň wekilleri, talyp ýaşlar, türgenler ir säherde geçirilen ýörişe ýokary ruhubelentlikde gatnaşdylar. Balkanabadyň döwrebap şaýollarydyr köçeleri bilen birnäçe kilometre dowam eden ýörişiň geçýän ugrunda ýaňlanan aýdym-sazlar, ýerine ýetirilen sport maşklary baýramçylygyň many-mazmunyny baýlaşdyrdy. Şeýle çäreler welaýatyň ähli etrap-şäherlerinde ýokary derejede geçirildi.