Magtymguly Pyragynyň 300 ýyllygy türki dünýäsinde giňden baýram ediler

Ýeri gelende belläp geçsek, akyldar şahyryň doglan gününiň 300 ýyllygy 2024-2025-nji ýyllarda ÝUNESKO bilen bilelikde bellenip geçiljek şanly seneleriň sanawyna goşuldy. Türki medeniýetiň halkara guramasy tarapyndan 2024-nji ýyl “Türki dünýäsiniň beýik şahyry we akyldary Magtymguly Pyragy ýyly” diýlip yglan edildi. Şeýle hem Hormatly Prezidentimiziň gol çeken karary esasynda ýurdumyzda bu ýylyň şygary “Pähim paýhas ummany Magtymguly Pyragy” diýlip bellenildi. Şunuň bilen baglylykda, şu ýylyň dowamynda ýurdumyzda köp sanly myhmanlaryň gatnaşmagynda iri halkara çäreleri: ýokary okuw mekdeplerinde halkara olimpiýadalary, dürli döredijilik çäreleri, ylmy-amaly maslahatlary we aýdym-sazly dabaralary geçirmeklik meýilleşdirilýär. Bu şanly sene diňe ýurdumyzda däl, eýsem türki halklaryň ählisinde diýen ýaly giňden bellenip geçiler.