“Nebitçi” futbol kluby

Berkarar döwletiň täze eýýamynyň Galkynyşy döwründe ýurdumyzda sportyň ähli ugurlary bilen meşgullanmak üçin şertler ýokary derejelerde döredilen. Şolaryň içinde dünýä ýüzünde hem iň meşhur sportyň görnüşi hasaplanýan futbol oýny ýurdumyzda pajarlap ösýär. Sportyň futbol görnüşine bolan islegler netijesinde hem ýaş ussat türgenleriň belent derejelere ýetmegi gazanylýar.

Häzirki wagtda Türkmenistanyň Ýokary ligasynda gowy netijeler bilen çykyş edýän Balkanabadyň “Nebitçi” futbol klubynyň hem baý taryhy bar. 1960-njy ýylda “Nebitçi” ady bilen döredilen bu professional klubyň häzirki wagta çenli 4 gezek Türkmenistanyň Ýokary ligasynyň we Türkmenistanyň göçme Kubogynyň çempiony, 2 gezek Türkmenistanyň Superkubogynyň eýesi. Türkmen futbolynyň ýatdan çykmajak ýyly bolsa 2013-nji ýyl boldy. Çünki şol ýyl “Nebitçi” futbol kluby Indoneziýada AFK Prezidentiň Kubogynyň eýesi boldular. 1:0 hasap bilen gelen ýeňiş türkmen futbol taryhyna altyn harplar bilen ýazyldy.

2010-njy ýylda klubyň ady “Balkan” futbol kluby hökmünde üýtgedildi. Şol at bilen 7 ýyldan gowrak wagt çykyşdan soň 2018-nji ýylda ýene “Nebitçi” futbol kluby adyna öwrüldi. Häzirki wagtda “Nebitçi” öý duşuşyklaryny 2010-njy ýylda açylyp ulanylmaga berlen Balkanabatdaky on müň orunlyk stadionda geçirýär.