Parahat ýurduň bagtly geljegi

Balkan welaýat häkimliginiň, Türkmenistanyň Magtymguly adyndaky Ýaşlar guramasynyň Balkan welaýat geňeşiniň we Balkan welaýat medeniýet müdirliginiň bilelikde guramaklarynda Halkara zenanlar güni mynasybetli Balkan welaýat döwlet drama teatrynda «Biz — parahat ýurduň bagtly geljegi» ady bilen aýdym-sazly dabara geçirildi. Onda çykyş edenler bahar paslynyň ilkinji günlerinde bellenip geçilýän Halkara zenanlar güni bilen bu ýere ýygnanan eneleri, gelin-gyzlary tüýs ýürekden gutladylar. Zehinli çagalaryň ýerine ýetirmeklerinde döwrebap aýdym-sazlaryň ýaňlanmagy baýramçylyk dabarasynyň şatlyk-şowhunyny hasam artdyrdy. Balkan welaýat çagalar sungat mekdebiniň «Balkan» hor döredijilik we tans toparlarynyň, Balkanabat şäheriniň 2-nji çagalar sungat mekdebiniň «Bagtyýar nesiller» hor we skripkaçylar, deprekçiler toparlarynyň, Balkanabat şäheriniň çagalar we ýetginjekler döredijilik öýüniň aýdymçylar toparynyň, «Monjuk» welaýat çagalar döredijilik toparynyň, Balkanabat şäher medeniýet merkeziniň «Abatjyk» çagalar tans we aýdymçylar toparynyň eziz Watanymyzy, parahatçylygy, baky Bitaraplygymyzy, mähriban enelerimizi, gelin-gyzlarymyzy, bagtyýar çagalygy wasp edip ýerine ýetiren aýdym-sazlary, tanslary şowhunly el çarpyşmalar bilen garşylanyldy.