Ruhy lezzet paýlan joşgunly çykyşlar

Balkan welaýat häkimliginiň Balkan welaýat medeniýet müdirligi bilen bilelikde Balkanabat şäherindäki “Türkmeniň ak öýi” binasynyň öňündäki meýdançada geçiren döwrebap çäresi “Milli sungatyň ruhy joşguny” diýlip atlandyrylyp, oňa welaýatyň etrap-şäherlerinden gelen tans we folklor döredijilik toparlary gatnaşdylar.

Halk döredijiliginiň döwrebap nusgalaryny has-da kämilleşdirmegi, ýurdumyzda geçirilýän toý-baýramlaryň şowhunyny belende göterýän kämil döredijilik toparlaryny ýüze çykarmaklygy maksat edinen medeni çärede tans we folklor döredijilik toparlarynyň ussatlyk bilen ýerine ýetiren çykyşlary tomaşaçylar tarapyndan dowamly el çarpyşmalar bilen garşylandy. Joşgunly aýdym-sazlarda, gazallardyr lälelerde diňe bir şöhratly geçmişimizden söz açylmak bilen çäklenilmän, eýsem, şu günki bagtyýar döwrümiz, röwşen geljegimiz belentden wasp edildi.

Balkanabat şäher medeniýet bölüminiň “Akjaýar”, “Durmuş ýollary”, Gyzylarbat etrap medeniýet bölüminiň “Köpetdag”, Bereket etrap medeniýet bölüminiň “Bereket ýaýlasy”, Türkmenbaşy etrap medeniýet bölüminiň “Joşgun” folklor döredijilik toparlarynyň çykyşlarynda Berkarar döwletiň täze eýýamynyň Galkynyşy döwrüniň rowaçlyklary, ruhubelent durmuşymyz, gözbaşyny asyrlaryň çuňluklaryndan alyp gaýdýan milli däp-dessurlarymyz öz beýanyny tapdy. 

Bu ýerde amaly-haşam we el işleriniň sergisi hem ýaýbaňlandyrylyp, medeni-ruhy, taryhy gymmatlyklarymyzy aýawly saklamakda hem-de dünýä ýaýmakda ýetilen belent sepgitler giňden beýan edildi.