Şanly wakanyň şanyna

Magtymguly etrabynyň 2022-nji ýylyň jemleri boýunça ýurdumyzyň iň gowy etraby diýlip yglan edilmegi täsin tebigatly bu etrabyň ýaşaýjylaryny uly buýsanja besledi. Soňky ýyllarda tanalmaz derejede özgerýän, dürli maksatly döwrebap desgalarynyň sany barha artýan etrabyň häkimligine hormatly Prezidentimiziň Buýrugyna laýyklykda, 1 million amerikan dollarynyň gowşurylmagy mynasybetli dabaralar biri-birine ulaşdy. Şol gün etrap merkezindäki Magtymguly Pyragy muzeýiniň öňündäki meýdança baýramçylyk keşbine beslenip, joşgunly aýdym-sazlaryň belent owazy dumly-duşy gurşap aldy. Bagşylaryň şirin aýdym-sazlary, tans toparlarynyň ýerine ýetiren tanslary, teatr artistleriniň sahnalary, sergiler dabara gatnaşyjylarda unudylmajak täsirleri galdyrdy. Dabaranyň myhmanlaryna milli tagamlar hödür edildi.

Magtymguly Pyragy muzeýiniň mejlisler jaýynda geçirilen dabaraly maslahata hem ýokary ruhubelentlik mahsus boldy. Şanly waka mynasybetli guralan dabaralar Gündogaryň beýik akyldary Magtymguly Pyragynyň doglan gününiň 300 ýyllygyna uly taýýarlyklary görýän etrabyň ilatynyň toý şatlygyny artdyrdy.