Sözen

Türkmen tebigatynyň gözelligini görmäge göz gerek. Ähli pasyllarda hem ol özboluşly gözellige eýe bolup, munuň şeýle bolmagynda dürli ösümlikleriň uly orny bardyr. Tebigatymyzyň agramly bölegini tutýan Garagum sährasynda-da şeýle ösümlikleriň ýüzlerçe görnüşi ösýär. Sözen hem şeýle ösümlikleriň biri bolup, onuň kümüş çaýylan ýaly ýapraklary, melewşe reňkli gülleri bolýar. Bu owadan agajyň kökleri çuňluga 2-3 metre, töwerekleýin 15 metre çenli ýaýylyp ösýär. Ol köplenç süýşýän çägeleriň üstünde bitýär. Ata-babalarymyz bu agajy guýy gazanlarynda, onuň gyralaryny hem berkitmekde giňden peýdalanypdyrlar.