Tomusky dynç alyş möwsümi başlandy

Balkan welaýat häkimliginiň, Balkan welaýat Baş bilim we medeniýet müdirlikleriniň çagalaryň tomusky dynç alyş möwsüminiň başlanmagy mynasybetli Balkan welaýat Taryhy we ülkäni öwreniş muzeýiniň öňündäki meýdançada geçiren dabarasy egsilmez şatlyk-şowhuna beslendi. Aýdym-sazly dabara «Awaza» milli syýahatçylyk zolagyndaky «Balkan», «Daýanç», «Arzuw», Gyzylarbat şäherindäki «Dürdäne», Balkanabat şäheriniň Hazar şäherçesindäki «Gara altyn» çagalar sagaldyş we dynç alyş merkezlerine dynç almaga barýan mekdep okuwçylary ýokary ruhubelentlik bilen gatnaşdylar. Dabarada ýerine ýetirilen aýdym-sazlarda eziz Watanymyzyň, ajaýyp zamanamyzyň, bagtyýar çagalygyň waspy belentden ýaňlandy. Bezemen awtobuslar bilen çagalar sagaldyş we dynç alyş merkezlerine ýola düşüşen bagtyýar ýaş nesiller ýolugra welaýatyň gözel binalary, tebigat täsinlikleri bilen tanyşdylar. Çagalar sagaldyş we dynç alyş merkezlerinde guralan aýdym-sazly dabaralar hem ýatdan çykmajak pursatlara baý boldy. Olarda çagalar aýdym-saz toparlarynyň çykyşlaryna giň orun berildi. Bagtyýar körpeleriň ýerine ýetiren şirin aýdym-sazlarynda, labyzly okan goşgularynda ata Watanymyzyň ajaýyp zamanamyzdaky ösüşleri, ýurdumyzda çagalar barada edýän aladalar aýdyň beýanyny tapdy.