Ýaş alymlaryň sylaglanyş dabarasy

12-nji iýunda Magtymguly adyndaky Türkmen döwlet uniwersitetinde ýaş alymlaryň hem-de talyplaryň arasynda her ýyl geçirilýän ylmy işler boýunça bäsleşigiň ýeňijilerini sylaglamak dabarasy boldy.

Bäsleşikde ýeňiji bolan ýaş alymlary sylaglamak dabarasyna hökümet agzalary, ministrlikleriň we pudaklaýyn dolandyryş edaralarynyň ýolbaşçylary, ylmy jemgyýetçiligiň wekilleri, ýokary okuw mekdepleriniň professor-mugallymlary, talyp ýaşlar gatnaşdylar.

Bäsleşige ýaşlaryň 1 müň 670-si gatnaşyp, olaryň 107-si ýeňiji boldy. Dabara gatnaşyjylaryň şowhunly el çarpyşmalary astynda ýeňijilere Türkmenistanyň Prezidentiniň adyndan diplomlar we gymmat bahaly sowgatlar gowşuryldy.

Soňra ýeňiji bolan ýaş alymlary sylaglamak dabarasy bilen ugurdaşlykda halkara bäsleşiklerinde üstünlikli çykyş edip, baýrakly orunlara mynasyp bolan ýaşlara Türkmenistanyň Prezidenti Serdar Berdimuhamedowyň hem-de Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyndan hormat hatlary we sowgat gowşurylyş dabarasy boldy.