Ýaş küştçüleriň bäsleşigi

Balkanabat şäheriniň kiçi ýaşly mekdep okuwçylarynyň arasynda «Küşt äleminiň zehinli ýaşlary» atly küşt boýunça ýaryş geçirildi. Türkmenistanyň «Küşt Älemi» hojalyk jemgyýeti tarapyndan guralan bäsleşik gyzykly hem-de çekeleşikli ýagdaýda geçip, onda ýaş küştçüler özleriniň barha kämilleşýändiklerini görkezdiler. Netijede, oglanlaryň arasynda 15-nji orta mekdebiň 3-nji synp okuwçysy Kerem Nazarow birinji, 1-nji orta mekdebiň 6-njy synp okuwçysy Sapar Maşadow ikinji, 11-nji orta mekdebiň 2-nji synp okuwçysy Goçmyrat Atadurdyýew üçünji orunlara mynasyp boldular. Gyzlaryň arasynda bolsa 1-nji orta mekdebiň 4-nji synp okuwçylary Karolina Pençukowa, Aýna Maşrykowa, 1-nji synp okuwçysy Mähriban Balkanowa degişlilikde birinji, ikinji, üçünji orunlary eýelediler. Ýaryşda öňdäki orunlara eýe bolanlara medallar, Hormat hatlary we ýadygärlik sowgatlar gowşuryldy.