«Ýazlagyň» ýag ýaly önümleri

 Gyzylarbat etrabynyň Paraw obasyndaky «Ýazlak» hususy kärhanasynyň hünärmenleri süýt we süýt önümleriniň bolçulygyny gazanmakda netijeli işleri alyp barýarlar. Türkmenistanyň Senagatçylar we telekeçiler birleşmesiniň agzasy, telekeçi Merdan Öwezgylyjowyň ýolbaşçylyk edýän kärhanasynda işler müşderileriň ösen islegi göz öňünde tutulyp ýola goýlupdyr. Bu ýerde zähmet çekýän ýaşlar öz hünärlerinden ussatlarça baş çykaryp, ýokary hilli süýt we süýt önümleriniň dürli görnüşlerini öndürmegiň hötdesinden gelýärler. Kärhana döwrebap tehnologiýalar bilen enjamlaşdyrylyp, olar önümçiligi üstünlikli alyp barmaga mümkinçilik berýär. Netijede, bu ýerde her aýyň dowamynda 45-50 tonna  süýt gaýtadan işlenýär.

Kärhanada öndürilýän ekologiýa taýdan arassa, howsuz önümler önümçilikden çykan badyna içerki sarp edijilere ýetirilýär. Bu ýerde taýýarlanýan sygyr süýdi, ýagsyz we az ýagly gatyk, tagamly nusgawy gatyk, ýagsyz uýadylan gaýmak, adaty we çig gaýmaklar, süzme, aýran, peýnir we beýleki önümler diňe bir Balkan welaýatynyň şäherlerinde, şäherçelerinde we obalarynda däl, eýsem, ýurdumyzyň beýleki welaýatlarynda hem uly islegden peýdalanýar. «Ýazlagyň» öndürýän gündelik önümleri üçin zerur bolan sygyr süýdi telekeçiniň öz hususy eýeçiligindäki sygyrlaryndan saglyp alynýar. Şeýle hem bu ýerde süýdi oba ilatyndan satyn almak hem ygtybarly ýola goýlupdyr.