Ýelbe

Ýelbe diýlip atlandyrylýan suw towugy ýurdumyzda Hazar deňziniň kenar ýakasyndan Amyderýa çenli, esasan, suw-batgalyk ýerlerde gabat gelýär. Hindistanda, Pakistanda we Gündogar Afrikada gyşlaýarlar, az bölegi Orta Aziýanyň günorta taraplarynda gyşlamaga galýar.

Ýelbe orta jüýje ölçegli, garamtyl reňkli, üsti açyk we garamtyl tegmilli çalymtyl-goňurrak-ýaşylymtyl, aşak tarapy ak tegmillerde gögümtil-çal, böwürleri kese zolakly, garnynyň ortasy agymtyl bolup, guýrugynyň aşagy zolaksyzdyr. Çüňküniň düýbi gyzyl, ujy ýaşylymtyl-sary, aýaklary ýaşylymtyldyr.

Sesi uzakdan eşidilýän suw towuklary ýazyna martyň ortasyndan apreliň aýagyna çenli, güýzüne sentýabr-oktýabrda uçup geçýärler. Bu guşlar iňrik garalanda, aýratyn-da, gijesine işjeň bolýarlar. Köplenç mör-möjekler, balykgulaklar, seýregräk ýagdaýda ösümlikleriň tohumlary we suwotular bilen iýmitlenýärler.