Zehinli zenanlar — döwrümiziň bezegi

Balkanabat şäherindäki «Bagt köşgi» toý dabaralary merkezinde Türkmenistanyň Zenanlar birleşiginiň Merkezi geňeşi tarapyndan guralýan «Ýylyň zenany» bäsleşiginiň Balkan welaýat tapgyry geçirildi. Zenanlaryň ukyp-başarnygyny ýüze çykarmagy, olaryň tekliplerini öwrenmegi we goldamagy, şeýle-de maşgala mukaddesligini gorap saklamagy, döwletimizde ýetilen belent sepgitleri wagyz etmegi maksat edinen bäsleşige gatnaşan zenanlar sekiz ugur boýunça güýç synanyşdylar. Netijede, Balkanabat şäheriniň Çagalar we ýetginjekler döredijilik öýüniň müdiri Güljemal Soltanowa «Ýylyň işewür zenany», Türkmenbaşy şäheriniň Çagalar we ýetginjekler döredijilik öýüniň gurnak ýolbaşçysy Täzegül Ýaýlymowa «Ýylyň çeper elli zenany», welaýat ýörite sungat mekdebiniň mugallymy Sapargül Hallymämmedowa «Ýylyň sungatda işjeň zenany», Magtymguly etrabyndaky 1-nji orta mekdebiň mugallymy Mäzem Garlyýewa «Ýylyň mährem zenany», Türkmenbaşy etrabynyň polisiýa bölüminiň derňew toparynyň uly sülçüsi Maman Garabegowa «Ýylyň watançy zenany», Bereket etrabyndaky 8-nji çagalar bagynyň müdiri Togta Şyhyýewa «Ýylyň öňdebaryjy oba zenany», Balkanabat şäheriniň Hazar şäherçesinden telekeçi Bahar Berdiýewa «Ýylyň telekeçi zenany», Gyzylarbat etrabyndaky 29-njy orta mekdebiň mugallymy Gülsenem Garaýewa «Ýylyň halypa zenany» diýen atlara mynasyp boldular. Ýeňiji bolan zenanlar bäsleşigiň döwlet tapgyryna gatnaşmaga hukuk gazandylar.