Zenanlaryň, eneleriň baýramynyň şanyna

Balkanabat şäherindäki «Türkmeniň ak öýi» binasynda Türkmenistanyň Zenanlar birleşiginiň Balkan welaýat bölüminiň guramagynda Halkara zenanlar güni mynasybetli dabaraly çäre geçirildi. Oňa dürli ulgamlarda zähmet çekýän gelin-gyzlar, mährem eneler gatnaşdylar. Baýramçylyk çäresinde gutlag çykyşlaryna giň orun berlip, olarda Berkarar döwletiň täze eýýamynyň Galkynyşy döwründe zenanlaryň bagtyýar durmuşda ýaşamagy, zähmet çekmegi we nesil terbiýelemegi ugrunda uly aladalaryň edilýändigi, olaryň hormat-sarpasynyň belent tutulýandygy barada bellenilip geçildi. «Türkmeniň ak öýi» binasynda geçirilen dabaraly çärede sungat ussatlarynyň, aýdym-saz, tans toparlarynyň çykyşlary hem giň gerimde ýaýbaňlandyryldy. Şirin aýdym-sazlarda, joşgunly tanslarda, küştdepdidir gazallarda ajaýyp zamanamyzyň, Halkara zenanlar gününiň, bahar paslynyň, eneleriň waspy belentden ýetirildi.